Lordan Suan

BAG-OHAY lang nagpasiugda si Cagayan de Oro 1st District Cong. Lordan Suan sa laing hugna sa orientation and contract signing alang sa mga benepisyaryo sa Government Internship Program kon GIP diha sa Macanhan, Brgy. Carmen, kung diin mikabat sa dul-an 300 ka mga indibidwal ang misalmot sa programang kaabag ang Department of Labor and Employment kon DOLE Region 10.

Masayran nga si Suan atoa sa Kaulohan aron mo tabang sa pag atiman sa nasudnong budget alang sa tuig 2025 hinungdan nga siya gi representaran alang sa maong okasyon sa iyang Assistant District Director nga si Bert Amplayo, kinsa namulong ngadto sa mga bag-ong benepisyaryo sa trabaho sa distrito.

Saysay pa ni Bert Amplayo, gikan sa nagkadaiyang barangay ang maong mga indibidwal, kinsa manarbaho sa nagkadaiyang ahensiya sa kagamhanan nga gitakda sa buhatan ni Cong. Suan sulod sa pila ka bulan, samtang mag dawatan kini sila sa minimum nga suholan matag adlaw.

Dugang saysay ni Amplayo, daku gayud og kahimoan ang pagpaningkamot ni Cong. Suan nga makasungkit og mga pundo gikan sa Kaulohang gobyerno arun maapod-apod sa mga molupyo sa iyang distrito, hilabina sa nagkinahanglan sa hinabang medikal, pang edukasyon ingon man ang panginabuhian aron lang ma kunhoran ang nasinating kalisdanan sa katawhan.