MIPADAYAG sa ilang dakung kalipay ug pagpasalamat ang mga ginikanan, magtutudlo ug tinun-an sa nagkadaiyang tulunghaan sa Unang Distrito sa Cagayan de Oro human si Cong. Atty. Lordan Suan hugot nga misuporta sa Brigada Eskwela 2024 pinaagi sa pagpadala ug pintal ug uban pang kagamitan, ingon man truck alang sa pag panghakot sa basura.
Sulti pa ni 1st District Assistant Director Bert Amplayo, naserbisyohan sa buhatan ni Cong. Suan ang ubay-ubay ka mga eskwelahan sa Brgy. Carmen, Canitoan, Bonbon, San Simon, Pagatpat, Besigan ug uban pa atol sa Brigada Eskwela 2024 human usab sa mando sa kongresista nga dili pasagdan ang paningkamot sa mga ginikanan, magtutungha ug magtutudlo alang sa pagpangandam sa mga lawak-saringan nga kini mahimong hapsay ug limpyo ilabina alang sa mga tinun-an.
Gikabutyag pa ni Amplayo nga gikalipay ni Cong. Suan nga wala nag pasagad ang iyang buhatan sa panginahanglan sa mga tunghaan uban sa pag ingon nga igo lamang usab kini nagtuman sa tuklod sa iyang kasing-kasing nga paluyohan gayud ang tanang kalihukan sa sektor sa edukasyon sanglit usa sa iyang adbokasiya ug responsibilidad maoman ang pagtabang nga kahatagag maayong kaugmaon ang mga kabataan.
Comentarios