Lipay ang ubay-ubay ka mga residente sa duha ka mga barangay sa dihang mi bisita si 1st District Cong. Lordan Suan panahon sa buntag didto sa Tignapoloan ug Dansolihon sa hapon diin natigayon kini kagahapon, adlaw nga Byernes asa mi tambong usab ang mga opisyales ug kawani sa mga nasangpit nga barangay.
Masayran nga dala ni Cong. Lordan Suan ang nagkadaiyang tambal sa balatian lakip na ang mga food packs para sa mga pamilya ug mga sports equipment alang sa kabataan nga aktibo sa paugnat sa kusog.
Sa maong duha ka okasyon, si Suan namahayag kalabot sa pag siguro nga magpabiling himsog ang panglawas sa katawhan ilabina sa distrito uno ug nga matud pa niya nga walay imposible ug dili ma kab-ut sa katilingban kong ang katawhan ug opisyales mag tinabangay sa ilang hiniusang tinguha sa pag palambo sa dakbayan.
Gikabutyag nga kini nga lakang pasiuna lamang sa mas daghan pang serbisyo nga buot dal-on sa buhatan ni Cong. Suan partikular sa hinterland barangays nga medyo distancya sa sentrong bahin sa syudad.
Comments